(Видео) Калиопи ја обои арената со храброста на хероите, ја натера да полета, па ја испрати со „Бато“: со публиката ги прослави јубилеите

Педесет години на сцената, шест децении живот, преполна арена, безвременски хитови, музички изненадувања и илјадници гласови што пееја заедно со неа. Калиопи приреди концерт за паметење во арената „Борис Трајковски“ во Скопје, славејќи два големи јубилеја со публиката која ја следи низ генерациите.

Вечерта беше исполнета со нејзините најпознати песни, но и со лични приказни, сеќавања и моменти во кои Калиопи ја покажа својата поврзаност со сцената. Во еден од разговорите со публиката откри дека непосредно пред настап се чувствува како бик кој едвај чека да излезе пред луѓето.

View this post on Instagram

— реклама —

Посебен момент беше изведбата на „Не заборавај“, кога илјадници светилки од мобилните телефони ја претворија арената во ѕвездено небо. Песната, создадена за Скопскиот фестивал во 1998 година, носи текст напишан од Калиопи и музика што ја создаде заедно со поранешниот сопруг, композиторот и продуцент Ромео Грил. Речиси три децении подоцна, публиката повторно ја пееше со неа. Ја испеа и „Месечина“ посветена на нејзиниот син Пако, за која во „Претрес“ има кажано дека секогаш и буди многу емоции.

View this post on Instagram

Едно од најголемите изненадувања беше појавувањето на Слаткаристика. Калиопи спектакуларно го најави, по што за првпат заедно ја изведоа новата, ремикс-верзија на „Обои ме“, дополнета со негови стихови за верата, мирот, правдата, слогата и храброста на хероите. Потоа го испеаја дуетот „Води ме“, кој минатата година го понесе признанието за хит на годината, а заеднички ја започнаа и „Полетај“, чија изведба ја продолжи Слаткаристика.

— реклама —

View this post on Instagram

Емоции донесе и малиот Николче, кого Калиопи го повика на сцената за заедно да ја испеат „Македонско девојче“. Публиката им се придружи во еден глас. Калиопи раскажа дека претходно го слушнала момчето како пее со неа во сала и му ветила дека ќе го покани на следниот концерт. Еден месец пред настапот, неговата мајка се јавила и договориле ветувањето да стане реалност.

— реклама —

View this post on Instagram

На концертот имаше место и за почит кон колегите и македонската музика. Калиопи изведуваше и песни од други музички имиња, а од сцената ги поздрави Каролина Гочева и Дуке Бојаџиев.

Меѓу впечатливите изведби беше и „Дај да пијам“, која започна со препознатливиот звук на македонскиот тапан, внесувајќи посебна енергија во арената.

За крај, како што е традиција на нејзините концерти, прозвучи „Бато“. По последните стихови, Калиопи се поклони длабоко пред музичарите од својот бенд и пред публиката, заокружувајќи ја вечерта посветена на половина век музика и живот исполнет со сцена.

Концертот, во организација на „Прагма продукција“, беше прослава не само на кариерата на Калиопи, туку и на долгогодишната врска меѓу неа и публиката – врска што, судејќи според атмосферата во полната арена, продолжува и по пет децении.

„Вие сте мојот еликсир“, им рече Калиопи на присутните, одговарајќи на прашањето како останала младолика и на 60 години.