Камерниот оркестар од Битола, Емил Ровнер и Симон Поповски со впечатлив настап на „Охридско лето“

Фестивалот „Охридско лето“ продолжи со концертната програма со музичката вечер „Внатрешен глас на виолончелото и виолината“, на која настапија НУ Камерниот оркестар на Битола, австрискиот виолончелист Емил Ровнер и македонскиот виолинист Симон Поповски. Концертот се одржа под диригентство на канадскиот композитор, диригент и педагог Евгениј Шчербаков.

— реклама —

Пред фестивалската публика беше изведена програма што ги спои современите авторски пристапи со различни музички традиции. На репертоарот беа „Фантазија на корејска тема“, „Еврејско капричо“ и „Концерт за виолончело бр. 2“ од Евгениј Шчербаков, како и „Три прелудиуми“ од Џорџ Гершвин во обработка на Шчербаков.

— реклама —

Посебен белег на концертот даде делото „Фантазија на македонски мотиви“ од виолинистот Симон Поповски, преку кое македонскиот музички израз беше претставен во рамки на меѓународната концертна програма. Во продолжение беа изведени и композициите „Трио за двајца“, „Расположение“ и „Во сеќавање на Гоце Коларовски“ од Шчербаков.

— реклама —

„Чувството да се настапува на вака голем фестивал секако е прекрасно. Станува збор за голем предизвик и за престижен фестивал на кој секоја институција и секој уметник се стреми да учествува. Диригентот воедно е и композитор на делата што ги изведовме. Станува збор за композитор чиј стил потсетува на Шостакович, но и на други современи композитори. За нас е голема чест и задоволство да соработуваме со ваков голем уметник. Особено ми е драго што публиката ја прифати оваа модерна музика и реагираше одлично на изведбата“, изјави виолинистот Симон Поповски.

Од „Охридско лето“ велат дека концертот уште еднаш ја потврдил определбата на фестивалот да биде сцена на која се среќаваат македонските и странските уметници, различните музички традиции и современите авторски изрази.