Канадскиот премиер Марк Карни сака поблиски односи со Европската Унија и разгледува дали неговата земја би можела да добие статус на „придружна членка“ на блокот, објави „Волстрит џурнал“, повикувајќи се на неименувани претставници од ЕУ и Канада.
Според весникот, Европската Унија, која досега не покажувала голема флексибилност околу различните форми на членство, сега е отворена за идејата Канада да добие придружен статус.
Потрагата на Отава по поблиски односи со Европа доаѓа во време на влошување на односите со САД. Трговските несогласувања со администрацијата на Доналд Трамп доведоа до воведување царини врз десетици милијарди долари трговска размена меѓу двете земји, што ја поттикна Канада да бара нови економски партнери.
Канада и ЕУ веќе разговараат за олеснување на движењето на канадските производи, услуги и работници поврзани со стратешки сектори, меѓу кои: енергетиката, вештачката интелигенција, одбраната и критичните минерали.
На маса се и планови за поставување подводни кабли, изградба на заеднички информативни центри, инфраструктура за складирање податоци во облак, нови сателитски мрежи и инфраструктура за транспорт на канадска енергија кон Европа.
Карни во повеќе наврати разговарал со европски лидери, особено со францускиот претседател Емануел Макрон, и за можноста Канаѓаните да можат да живеат и работат во Европската Унија без визи.
Макрон и Карни треба да се сретнат на 20 септември на француската територија Сен Пјер и Микелон, островска група во близина на канадскиот атлантски брег. Од Елисејската палата соопштија дека тоа ќе биде прва официјална посета на канадскиот премиер на островите и дека средбата ќе ја симболизира блискоста меѓу двете земји.
Сепак, продлабочувањето на односите меѓу Канада и ЕУ би можело да наиде на низа пречки. Како еден од примерите се наведува и постојниот трговски договор меѓу Канада и Унијата. Иако договорот е постигнат пред повеќе од една деценија и привремено се применува веќе девет години, неколку земји членки на ЕУ сè уште не го ратификувале.
