Канадската атлетичарка Алиша Њуман е суспендирана на 20 месеци поради прекршување на антидопинг правилата поврзани со обврската за пријавување на својата локација, иако не била позитивна на допинг-тест, соопшти Атлетската единица за интегритет (АИУ).
Њуман, освојувачка на олимписка бронза во скок со стап од Париз 2024, е казнета затоа што во период од 12 месеци трипати не била достапна за ненадејно тестирање. Според правилата, спортистите мора секојдневно да пријавуваат едночасовен временски интервал во кој мора да бидат достапни за антидопинг контроли, а три пропусти во тој период се сметаат за прекршок.
Првиот пропуст бил регистриран во февруари минатата година, а два дополнителни во август, по што е покрената дисциплинска постапка. Во еден од случаите, Њуман наводно изјавила дека мора итно да оди на снимање на телевизиски квиз, поради што тестирањето не било извршено.
Иако стандардната казна за вакви прекршоци изнесува две години, суспензијата е намалена на 20 месеци, бидејќи нејзината одлука за привремено повлекување од врвниот спорт била земена како олеснителна околност.
Њуман во својата кариера има постигнато значајни резултати, а на Олимписките игри во Париз 2024 го освои бронзениот медал со нов канадски рекорд од 4,85 метри, станувајќи првата Канаѓанка со олимписки медал во оваа дисциплина. По тој успех се здобила и со голема популарност надвор од спортот, вклучувајќи ангажмани во моделинг и активност на социјалните мрежи.