Американскиот рапер Канје Вест одржа спектакуларен концерт на Олимпискиот стадион Ататурк во Истанбул, пред повеќе од 118.000 посетители, со што, според организаторите, е поставен нов рекорд за посетеност на стадионски концерт.
Настапот започнал во 21 часот по локално време и уште пред стартот предизвикал огромен интерес кај обожавателите. Вест се појавил на специјално изградена сцена во форма на планетата Земја, додека почетокот бил проследен со синхронизирани светлосни ефекти што ја осветлиле целата арена.
Концертот прераснал во целоноќен музички спектакл со настапи на диџеи, ласерски и светлосни шоу-програми, како и настапи на турски музичари. На сцената му се придружил и раперот Тревис Скот, претворајќи го настанот во вистински музички фестивал што траел до доцна во ноќта.
Големиот број посетители предизвикал сериозни сообраќајни метежи во делови од Истанбул. Илјадници луѓе се упатиле кон стадионот уште од попладневните часови, а најголем притисок бил забележан во метрото, особено на линијата М9 Атакој–Олимпијат.
На концертот присуствувале обожаватели од цела Турција, но и гости од Русија, Казахстан, Обединетото Кралство, Германија, САД и Полска.
