Опозициската СДСМ обвини дека заплената на околу пет тони дрога во соседна Србија, за која се наведува дека потекнува од Македонија, претставува еден од најголемите картелски скандали во регионот и побара итна и целосна одговорност од надлежните институции.
Од партијата посочуваат дека меѓу уапсените лица има и косопственик на македонска фирма, што, според нив, дополнително ја засилува сериозноста на случајот. СДСМ прашува како е можно толкава количина наркотична дрога да ја мине македонската граница и да заврши на српска територија без, како што велат, поддршка или пропуст од структури во власта и институциите.
Во соопштението се наведува дека Владата молчи, додека јавноста со денови чека одговори на клучните прашања – кој дозволил дрогата да помине, кои институции потфрлиле и дали постои вмешаност на високи функционери во, како што го квалификуваат, картелскиот ланец.
СДСМ потсетува дека подолго време алармира за поврзаност меѓу криминални структури во Македонија и Србија, додавајќи дека сè уште нема одговор ниту за фотографиите на премиерот Христијан Мицкоски со лице со иницијали С.З., познато како Симе, кое било уапсено во друг случај поврзан со дрога, оружје, муниција и поголема сума пари.
Во реакцијата се наведува и дека во судските постапки во Србија и Црна Гора се цитираат таканаречени „Sky“ преписки во кои се споменува „шефот Оскар“, додека истовремено Соединети Американски Држави подготвуваат закон за Западен Балкан со фокус на борбата против корупцијата и организираниот криминал.
СДСМ оценува дека случајот ја става Македонија во исклучително негативен контекст и порачува дека за ваков, како што велат, картелски скандал мора да има одговорност, нагласувајќи дека „работата не е завршена“ и дека сите инволвирани, без исклучок, ќе мора да одговараат пред јавноста и институциите.
