Американскиот милијардер Илон Маск постигна спогодба со Комисијата за хартии од вредност на САД во спорот поврзан со купувањето на Твитер, денес познат како Икс.
Според договорот, фондацијата поврзана со Маск ќе плати граѓанска казна од 1,5 милиони долари, без признавање вина, а тој нема да мора да ги врати средствата што, според регулаторот, ги заштедил со доцнењето во објавувањето на својата инвестиција.
Случајот се однесува на 2022 година, кога Маск задоцнил 11 дена со пријавување дека поседува над 5 отсто од акциите на Твитер. Во меѓувреме, купил акции во вредност од над 500 милиони долари по пониска цена, пред јавноста да дознае за неговото учество, кое подоцна достигнало 9,2 проценти.
SEC тврдеше дека со тоа биле оштетени други инвеститори и бараше Маск да плати казна и да врати околу 150 милиони долари. Но, според извори, таквото барање било тешко изводливо на суд, што довело до компромис.
Адвокатот на Маск, Алекс Спиро, изјави дека неговиот клиент е „целосно расчистен“ по ова прашање.
Ова не е прв судир на Маск со регулаторот. Во 2018 година, тој плати 20 милиони долари и се повлече од функцијата претседател на управниот одбор на Тесла поради контроверзна објава за приватизација на компанијата.
И покрај спогодбата, Маск се соочува со одделни тужби од акционери, поврзани со неговите изјави за бројот на лажни профили на Твитер, за кои тие тврдат дека влијаеле врз цената на акциите.
