Санкционирани се 140 возачи во рамки на акциската контрола што вчера ја спроведе Министерството за внатрешни работи на територијата на целата држава, насочена кон возачите на велосипеди, велосипеди со помошен мотор, мопеди, мотоцикли, трицикли и четирицикли.
Контролата се одвивала од 17 до 22 часот, а најголемиот дел од констатираните прекршоци, односно 102, се однесуваат на управување без задолжително носење заштитен шлем — кацига. При контролите биле откриени и двајца возачи кои управувале под дејство на алкохол.
Најмногу прекршоци се констатирани на подрачјето на СВР Струмица — 33. Следуваат СВР Тетово и Мобилната единица за безбедност на сообраќајот на патиштата со 17 прекршоци, СВР Куманово со 15, СВР Битола и СВР Охрид со по 13, СВР Велес со 12, СВР Скопје со 11 и СВР Штип со девет прекршоци.
За прекршоците се преземени соодветни мерки и санкции согласно Законот за безбедност на сообраќајот на патиштата, додека против осум возачи се поднесени кривични пријави согласно член 297-а од Кривичниот законик.
При акцијата биле констатирани и дополнителни 156 прекршоци од друг вид.
МВР најавува дека продолжува со засилените сообраќајни контроли со цел зголемување на безбедноста на сите учесници во сообраќајот и апелира до возачите на мотоцикли, мопеди и останатите видови возила да ги почитуваат сообраќајните правила, задолжително да користат заштитна опрема и да не управуваат под дејство на алкохол.
