Поп-ѕвездата Кејти Пери открила дека го променила своето вистинско име поради тешкото детство и стравот како јавноста ќе ја доживува надвор од сценскиот имиџ.
Пејачката, родена како Кетрин Елизабет Хадсон, во интервју за „Гардијан“ во 2017 година изјавила дека пораснала во строго религиозно семејство, со родители пентекостални пастори, и дека чувствувала потреба да избега од тој период од животот.
„Многу луѓе живеат во страв поради нешто што им се случило во детството или поради некаков облик на траума. Така го создадов ликот Кејти Пери, кој во голема мера сум јас, но го создадов и за да се заштитам“, рекла пејачката.
Таа признала дека се плашела обожавателите да не се разочараат ако ја видат како „обична“ Кетрин Хадсон, а не како гламурозна поп-ѕвезда.
„Не сакав да бидам Кетрин Хадсон. Го мразев тоа име, ми беше премногу застрашувачко, па одлучив да станам некој друг“, изјавила Пери.
Нејзиното вистинско име повторно привлече внимание на доделувањето на MTV Video Music Awards во 2024 година, кога тогашниот партнер Орландо Блум ја претстави како Кетрин Хадсон додека ѝ ја врачуваше наградата „Видео Вангард“.
„Вие се вљубивте во неа како Кејти Пери, а јас се вљубив во неа како Кетрин Хадсон“, изјавил Блум пред публиката.
Во јуни 2025 година беше потврдено дека Пери и Блум ја прекинале врската, но останале во добри односи поради нивната ќерка Дејзи. Според блиски извори, двајцата продолжуваат заеднички да се грижат за детето и да одржуваат пријателски однос.
