Министерството за надворешни работи на Украина ги отфрли тврдењата на Каја Калас дека амбасадата на САД била единствената дипломатска мисија што ја напуштила Украина по најновите закани од Русија.
Министерството нагласи дека американската амбасада не ја напуштила Украина.
„Извештаите за заминување на амбасадата на САД не се точни“, им изјавил на новинарите Георгиј Тихиј, портпарол на украинското Министерство за надворешни работи.
Претходно, пред неформалниот состанок на Советот за надворешни работи на Европската Унија на Кипар, Калас изјавила дека американската амбасада била единствената што ја напуштила Украина по најновите закани од Кремљ.
„Исто така, вчера слушнавме од Украина дека сите амбасади останале освен една. Значи, тоа бара храброст од тие амбасади. Но да, сите Европејци останаа. Америка си замина“, рекла Калас.
Во меѓувреме, Украина тврди дека Русија спроведува кампања на дезинформации против балтичките земји, обвинувајќи ги дека ѝ дозволиле на Украина да го користи нивниот воздушен простор за напади врз Русија.
Калас ги критикувала и руските закани кон балтичките држави, оценувајќи дека обвинувањата од Москва се „целосна бесмислица“ и знак на слабост.
