Киев под жесток удар: расте бројот на загинати, прогласен Ден на жалост

Во 1.541-от ден од војната во Украина, руските сили изведоа масовни воздушни удари врз повеќе цели низ земјата, а Киев беше меѓу најтешко погодените. Според градските власти, станува збор за еден од најжестоките напади од почетокот на војната, со човечки жртви и голем број повредени.

Украинската Државна служба за вонредни ситуации соопшти дека бројот на загинати во ударот врз Дарницкиот округ во Киев се искачил на 12 лица, меѓу кои и две деца. Спасувачките екипи продолжуваат со пребарување под урнатините, а во операциите се вклучени и тимови со кучиња трагачи.

— реклама —

Од Градската државна администрација на Киев информираа дека во денешниот масовен напад се повредени 43 лица, меѓу кои и две деца. Властите наведуваат дека состојбата на дел од повредените се следи во болнички установи, додека спасувачите и понатаму работат на терен.

— реклама —

Градоначалникот на Киев, Виталиј Кличко, објави дека 15 мај е прогласен за Ден на жалост во спомен на жртвите од големиот напад врз главниот град. Мерката предвидува оддавање почит со спуштени знамиња и ограничување на забавни настани.

Претседателот на Украина, Володимир Зеленски, изјави дека во брановите масовни напади на 13 и 14 мај Русија употребила 1.567 дронови и 56 ракети од различни типови. Тој наведе дека процентот на пресретнати дронови достигнал 94%, а на ракети 73%, посочувајќи дека клучен предизвик остануваат балистичките ракети и заштитата на инфраструктурата и градовите.

— реклама —

„Ова е намерна терористичка тактика – нападите се темпираат за да бидат што помасовни и да ја преоптоварат противвоздушната одбрана“, порача Зеленски.

— реклама —

Одделно, од Запорошката нуклеарна електрана соопштија дека во напад со дронови во близина на периметарот на централата биле повредени двајца вработени додека биле на должност. Според соопштението, повеќекратните напади ја отежнале евакуацијата на повредените.

Во меѓувреме, претседателката на Европската комисија, Урсула фон дер Лајен, оцени дека Русија „отворено се потсмева“ на дипломатските напори за враќање на мирот во Украина.