Кина и Русија во заедничка изјава го осудија американскиот проект „Златна купола“ и можноста за поставување оружје во вселената, оценувајќи дека таквите планови претставуваат закана за глобалната безбедност и стратешката стабилност.
Станува збор за американски повеќеслоен систем за противракетна одбрана, развиен по примерот на израелскиот систем „Железна купола“, чија цел е откривање и пресретнување балистички, хиперсонични и крстосувачки ракети.
За разлика од израелскиот систем, американската „Златна купола“ би функционирала преку мрежа од илјадници сателити во орбитата и би покривала глобален простор.
Во заедничката изјава на кинескиот претседател Си Џинпинг и рускиот претседател Владимир Путин се наведува дека таквата технологија „претставува јасна закана за стратешката стабилност“.
„Со тоа значително се зголемува ризикот од конфликти во вселената, се поттикнува нејзина милитаризација и претворање во арена на вооружен судир, што е спротивно на принципите за мирољубиво користење на вселената“, се наведува во документот.
Москва и Пекинг оценуваат дека ваквите проекти дополнително ја влошуваат и онака сложената безбедносна состојба во светот.
