Кинеска компанија „Фотон матрикс“ разви уред кој со помош на ласерски зрак ги препознава и уништува комарците во воздух. Уредот може да ги детектира на растојание до шест метри, а целиот процес од препознавање до дејство трае околу три милисекунди.
Технологијата комбинира ЛиДАР сензори, препознавање слики со помош на вештачка интелигенција и обработка на сигнали. ЛиДАР-от со ласерски импулси создава тродимензионална слика од просторот и ги регистрира и малите подвижни објекти.
Бидејќи во воздухот има различни објекти, како муви, молци, прашина и лисја, системот користи вештачка интелигенција за да утврди дали објектот е комарец. Притоа се анализираат неговата големина и начинот на летање, а ласерот се активира само откако системот ќе потврди дека целта е комарец.
Според производителот, уредот има повеќе безбедносни механизми и автоматски го исклучува ласерот кога човек ќе влезе во неговиот работен опсег.
Уредот е наменет за затворени простории, дворови и кампување. Домашната верзија чини 988 долари, додека индустриската верзија е 1.088 долари. Компанијата наведува дека уредот веќе се користи во Синџијанг, во северозападна Кина, и дека се извезува и на други пазари.
Сепак, засега нема достапни независни тестирања кои би покажале колку е ефикасен уредот во реални услови и колку значително може да го намали бројот на комарци во подолг период.
Производителот наведува домет од шест метри, но ласерскиот систем работи по права линија, па мебелот и другите пречки можат да го ограничат неговото дејство. Дополнително, уредот не ги покрива комарците кои се наоѓаат надвор од видното поле на сензорот или веќе слетале на кожата.
Затоа, и покрај новата технологија, остануваат важни и основните мерки за заштита – мрежите на прозорците, отстранувањето на застоена вода околу домот и користењето вентилатори, кои можат да го отежнат летањето на комарците.
