Кина денеска соопшти дека привремено го забранува извозот на хелиум, стратешки важен елемент што се користи во производството на полупроводници, во услови на нарушени глобални синџири на снабдување поради војната со Иран.
Кинеското Министерство за трговија и Царинската управа соопштија дека мерката стапува во сила веднаш, повикувајќи се на Законот за надворешна трговија. Во соопштението не беа наведени дополнителни причини за одлуката.
Хелиумот е неопходен за производството на чипови, а се користи и во медицината, меѓу другото за ладење на апаратите за магнетна резонанца. Од почетокот на војната со Иран, глобалното снабдување со хелиум е сериозно нарушено, што доведе и до раст на цените.
Според анализата на консултантската компанија „Trivium China“, Кина произведува околу 15 проценти од сопствените потреби за хелиум, додека најголемиот дел го увезува од Катар, кој обезбедува приближно една третина од светското производство.
Економистот Гери Нг од француската банка „Natixis“ оценува дека целта на мерката е да се заштити домашната индустрија и да се обезбедат доволни количини хелиум за кинеските производители, особено во секторот за чипови.
Одлуката доаѓа во период кога Кина интензивно ги развива сопствените капацитети за производство на чипови и вештачка интелигенција, додека технолошката конкуренција со САД дополнително се засилува.
Иако аналитичарите сметаат дека Кина не е голем извозник на хелиум и дека мерката нема драматично да го погоди светскиот пазар, предупредуваат дека во услови на веќе ограничено снабдување таа може дополнително да го зголеми притисокот врз глобалната понуда.
