Кинески функционер осуден на смрт поради корупција, примил поткуп од 324 милиони долари

Поранешен висок локален функционер во Кина е осуден на смрт откако судот го прогласи за виновен за корупција, злоупотреба на службената положба, перење пари и други кривични дела, соопштија кинеските власти.

— реклама —

Според пресудата на Народниот суд во Чангџоу, во покраината Џангсу, Јанг Јулин незаконски примил пари и имот во вредност поголема од 324 милиони американски долари додека извршувал различни државни функции во периодот од 1993 до 2023 година.

Во соопштението на судот се наведува дека Јанг на судењето ја признал вината и изразил каење за сторените дела.

— реклама —

Пресудата е донесена во рамки на долгогодишната антикорупциска кампања што ја спроведува кинескиот претседател Си Џинпинг, во која досега биле опфатени милиони вработени во државниот апарат.

— реклама —

Во последните години, кинеските судови изрекуваат смртни казни во најтешките случаи на корупција, особено кога незаконски стекнатата имотна корист надминува околу 147 милиони американски долари.

Минатата година беше егзекутиран Ли Џијанпинг, поранешен функционер од Внатрешна Монголија, кој беше осуден во случај поврзан со корупција вредна повеќе од 440 милиони долари.

Во друг познат случај, функционерот Жанг Џонгшенг во 2018 година беше осуден на смрт поради примање поткуп во вредност поголема од 147 милиони долари, но по жалбената постапка казната во 2021 година му беше преиначена во условна смртна казна, која подоцна беше заменета со доживотен затвор.