Универзитетската клиника за урологија во Скопје официјално ги пушти во употреба новите оперативни сали, изграден и опремен хируршки простор кој, според Клиниката, ги исполнува највисоките современи стандарди.
Од Клиниката информираат дека инвестицијата ќе овозможи подобри услови за изведување хируршки интервенции, поголема безбедност за пациентите, повисок квалитет на здравствените услуги и посовремени услови за работа на медицинскиот персонал.
Првите операции извршени во новите сали биле вградување инфлатабилни пенилни протези, една од најсовремените и најсложени хируршки процедури за лекување на еректилна дисфункција, која неодамна стана достапна и во рамки на јавното здравство.
Од Универзитетската клиника за урологија оценуваат дека отворањето на новите оперативни сали претставува значаен чекор кон унапредување на квалитетот на здравствената заштита и модернизација на јавното здравство.
