Кобилата и ждребето се згрижени, Ѓорѓиевски бара итна акција од АХВ и Министерството

Градоначалникот на Скопје, Орце Ѓорѓиевски, соопшти дека кобилата која утрово се ождреби на улица и нејзиното ждребе се преземени и сместени на безбедно, а од надлежните институции побара итна акција за проблемот со напуштените и експлоатирани животни низ градот.

„Раѓањето нов живот треба да биде убава вест. Но, кога тоа се случува на асфалт, во несоодветни услови и изложено на опасност, тоа е сериозен повик за одговорност“, порача Ѓорѓиевски.

— реклама —

Според него, по информациите за случајот веднаш интервенирале екипите и стручните лица од ЗОО – Скопје.

Кобилата и новороденото ждребе се сместени во карантин, каде што треба да добијат соодветна нега и стручен третман.

— реклама —

Ѓорѓиевски нагласува дека интервенцијата во конкретниот случај не го решава поширокиот проблем и ги повика Агенцијата за храна и ветеринарство и Министерството за земјоделство, шумарство и водостопанство да започнат заедничка и координирана акција.

Тој бара мерки за заштита и соодветно згрижување на животните, но и утврдување одговорност во случаите на нивна експлоатација и злоупотреба.

— реклама —

„Не смееме да се навикнеме на сликите на напуштени и експлоатирани животни по скопските улици“, порача градоначалникот.

Иако, како што вели, ова прашање не е во надлежност на Град Скопје, Ѓорѓиевски ги стави на располагање градските капацитети за евентуална заедничка акција.

— реклама —

Тој побара итен одговор од надлежните институции и најави дека доколку изостане постапување, Градот ќе преземе иницијатива преку механизмите што му стојат на располагање.

„Нема да дозволам ова да остане само уште една вест што ќе се заборави до утре“, порача Ѓорѓиевски.