Министерот за здравство Азир Алиу јавно ја поддржа предложената законска регулатива за игри на среќа и забавни игри, која веќе помина во прво читање на пленарна седница во Собранието.
Во видео-обраќање, Алиу порача дека зависноста од коцкање претставува сериозен здравствен ризик и дека превенцијата е најдобриот начин за справување со овој проблем.
„Не може да зборуваме за коцкањето дека е забава, кога истото станува навика и зависност. Кога влегува во семејството како долг, стрес, вознемирување и кога подмолно се вгнездува во животот на младите уште пред да созреат“, вели министерот.
Тој посочи дека како министер за здравство има обврска јавно да предупреди за последиците од зависностите и затоа ги поддржува мерките што предвидуваат поголема заштита на младите.
„Како министер за здравство, имам обврска да кажам дека зависноста е здравствен ризик, а најефективната терапија за неа е превенцијата. Затоа ја поддржувам секоја законска мерка што ќе ги тргне кладилниците и коцкарниците подалеку од училиштата и што ќе го намали рекламниот притисок врз младите“, нагласува Алиу.
Според него, предложените измени не се само регулаторна мерка, туку и прашање на заштита на јавното здравје.
„Ова е битка за менталното здравје, за семејствата и за иднината на децата. Вреди да поставиме граници“, порачува министерот за здравство.
Предлог-законот предвидува казината и обложувалниците да бидат оддалечени најмалку 500 метри од училиштата, ограничување на рекламирањето на игрите на среќа и засилени механизми за контрола на нивното работење.
