Владата веќе донесе одлука за забрана на извоз на брашно и пченица од земјава, како дел од мерките поврзани со коронавирусот и заштита на граѓаните. Покрај ова, таа ги задолжи Царината, во соработка со Министерството за земјоделство, во наредниот период да го следат трендот на извоз на рафинирано сончогледово масло за јадење, ориз, кондиторски и пекарски производи, односно тестенини, бисквити и слично. Тоа значи дека ќе се внимава и на извозот на овие производи, Објави Фактор.мк.
Упатени кругови со кои контактираше Фактор велат дека до прекин во испораката на стоки сигурно нема да дојде. Ова од причина што државите договорија дека транспортот на стока нема да прекине, односно тој ќе продолжи, со тоа што ќе се почитуваат специјалните протоколи за заштита.
Фактор пишува дека во поглед на потребите од пченица, земјава покрива половина од своите потреби, а половина увезува. Најголем дел од тој увоз, односно 95 проценти, доаѓа од соседна Србија. Земјава нема производство на шеќер и тој доаѓа од увоз, додека потребите за масло за јадење, согласно пподатоците од домашните производители, целосно може да се задоволат од домашни потреби.
Нашата држава увезува и млеко, иако имаме и доволно производство, но и смрзнато месо, како суровина за месната индустрија, пишува Фактор.мк.
