„Кој е интересот на талогот на СДС и Филипче да се стават на линија на Кина, против нашиот стратешки партнер, САД?“, вели ВМРО-ДПМНЕ

ВМРО-ДПМНЕ преку соопштение го обвини СДСМ дека со своите ставови за изградбата на центри за податоци во Македонија застанува на спротивната страна од интересите на САД, кои ги опиша како стратешки партнер на земјата.

Од партијата велат дека СДСМ, иако декларативно се претставува како прозападно ориентирана партија, во практиката зазема позиции кои, според нив, се поблиски до Кина. Како пример го посочуваат спротивставувањето на можноста во земјава да се градат центри за податоци и да се развива ИТ-индустријата.

— реклама —

„Тоа се гледа во нивното делување, лажењето, заплашувањето и хистеријата која ја креираат во државата за да се спротивстават на можноста во Македонија да се градат центри за податоци и да се развива ИТ-индустријата“, наведуваат од ВМРО-ДПМНЕ.

— реклама —

Партијата тврди дека аргументите на СДСМ, според кои изградбата на центри за податоци би довела до поголема потрошувачка на електрична енергија, повисока цена на струјата и загрозување на водата за пиење, се совпаѓаат со тези што, како што наведуваат, ги шират кинески ботови на социјалните мрежи во САД.

Од ВМРО-ДПМНЕ прашуваат кој е интересот на СДСМ и на претседателот на партијата, Венко Филипче, да застапуваат ставови за кои тврдат дека се спротивни на развојот на ИТ-секторот и на интересите на стратешкиот партнер на Македонија.

— реклама —

„Дали СДС повеќе би сакале во државата да инвестираат кинески компании отколку напредни ИТ-компании од САД?“, прашуваат од партијата.

ВМРО-ДПМНЕ во соопштението го критикува и досегашното управување на СДСМ, обвинувајќи ја партијата дека за време на седумгодишното владеење доделила околу 70 лиценци за производство на марихуана, што, според нив, било направено во интерес на нивни блиски луѓе.

Од ВМРО-ДПМНЕ велат дека Македонија треба да се насочи кон создавање напредни и добро платени работни места преку привлекување инвестиции во вештачката интелигенција и ИТ-секторот, оценувајќи дека тоа се области кон кои се движи глобалниот развој.