Три стана на Водно и гаража кои припаѓаа на ексдиректорот на УБК, Сашо Мијалков, беа продадени на аукција што ја споведе Агенцијата за управување со одземен имот.
Директорот на агенцијата, Дритон Небиу, објасни дека се работи за недвижнини кои со правосилна судска пресуда беа одземени од Сашо Мијалков. Поточно, на денешното наддавање, продадени беа три стана на Водно, од кои еден од 78 метри квадратни, два од 73 и гаража од 30 метри квадратни.
„За недвижнините имаше наддавање и заврши успешно. Согласно постигнатите вредности, во државниот буџет ќе бидат уплатени парични средства кои беа одземени од граѓаните и ќе бидат повратени во вкупна вредност од 332.276 евра“, рече Небиу.
За истиот предмет наредната недела ќе биде спроведено уште едно јавно наддавање, најави тој.
На новинарско прашање, кој е новиот сопственик на имотот на Мијалков, како и дали сите три стана ги купило едно лице, директорот Небиу не даде конкретен одговор. Тој ги повика граѓаните да се охрабрат и да аплицираат на секое јавно наддавање бидејќи постапката е транспаретна.
