„Ви се претставувам како кандидат за претседател на државата, привилегија е да имам доверба од толку многу фактори, одговорност е да се биде нивни избраник и нивни доверлив човек, привелегијата е вашиот глас“, со овие зборови, Арбен Таравари, најави претседателска кандидатура. Во придружба на лидерот на Демократското движење, Изет Меџити, на Движењето Беса, Билал Касами, на Алтернатива, Африм Гаши, како и претставникот на Движењето Самоопределување, Беким Ќоку кажа дека време е за претседател да биде Албанец.
„Со почит го чекам гласот на секој од вас, дојде време државата да има претседател Албанец, не технички туку вистински. На секој кандидат му посакувам успех“, кажа Таравари.
Тој најави дека ќе побара поддршка од сите албански, македонски и други партии.
„Бараме поддршка и од невладините организации, сите групи на граѓани“, додаде Таравари.
На прашањето зошто прво кажа дека не е заинтересиран да биде кандидат пред 15 дена, а сега излегува како кандидат, одговори: „Предлогот е од пред еден месец, инсистирањето беше од пријатели, другари, од истомиследници. Седнавме со партиите од опозицијата, сега сме заедничка опозиција и тело кое функционира заеднички, па дојдовме до констатација дека најдобро би било јас да се кандидирам за претседател. Јас одлучив синоќа доцна дека дефинитивно ќе се кандидирам. Ќе добиеме поголема поддршка од тоа што очекуваме“.
