Додека јавноста е концентрирана на Бојан Јовановски и неговата улога во случајот „Рекет“, околу 100 вработени во 1ТВ стравуваат за својата иднина. Добиваат поддршка од граѓаните, но разочарани се од колегите новинари, пишува Дојче веле.
Заминување од 1ТВ засега најавил само еден новинар-уредник. Во телевизијата веќе неколку недели ги нема уредниците кои работеле на проекти со хонорарни договори. Меѓу нив и, сега веќе, поранешниот главен и одговорен уредник Ацо Кабранов. Тој не е оптимист за иднината на 1ТВ по скандалот „Рекет“ во кој првоосомничен е сопственикот Бојан Јовановски.
„Песимист сум дека 1ТВ може да продолжи со работа. Жал ми е за 70-на новинари, камермани и друг технички кадар кој вредно и чесно си ја вршеше работата, а сега ќе мора да се соочат со реалноста, да си бараат друга работа за егзистенција“, вели Кабранов. Тој признава дека скандалот само ја забрзал неговата одлука за повлекување.
Резигнираноста на Кабранов ја споделуваат и во телевизијата, но не од скандалот на сопственикот, туку од односот на колегите новинари од другите медиуми и од некои од честите гости во програмата.
„Секојдневно добиваме поддршка од граѓани, но разочарани сме од колегите кои ни „фаќаат сеир“, како и од луѓе кои беа чести гости на нашата програми и ја фалеа нашата професионалност“, вели уредничка во 1ТВ која инсистираше на анонимност.
Шпекулациите за вмешаноста на сопственикот кои циркулираа во јавноста долго пред обелоденувањето на скандалот, стигнале и до ушите на новинарите во телевизијата. Некои од нив признаваат дека стравувале оти вакво нешто може да се случи но, велат, „какви се газдите во другите медиуми?“
Директорката и таткото на Бојан Јовановски, според новинарите со кои разговаравме, секојдневно се во телевизијата. Од вработените се барало трпение додека да се направат билансите. Досега платите ги добивале редовно, но дали ќе ја добијат следната, засега никој од новинарите не знае, ниту добил такво ветување.