Комбе за ученички превоз имало неисправни сопирачки, а се превезувале и двојно повеќе патници од дозволеното

Полицијата при контрола кај Табановце откри сериозни неправилности кај комбе со кое се вршел организиран превоз на ученици. Во возилото биле превезувани 18 деца, иако според сообраќајната дозвола било дозволено да има најмногу девет лица.

— реклама —

Контролата била извршена на 25 септември во 07:20 часот на локалниот пат Куманово-Табановце, во село Табановце, од полициски службеници од Мобилната единица за безбедност на сообраќајот на патиштата при Секторот за сообраќајни работи.

— реклама —

Станувало збор за комбе со кумановски регистарски ознаки, сопственост на правен субјект од Куманово, наменето за јавен превоз на патници, односно организиран превоз на ученици. При контролата било утврдено дека возачот С. П. (49) од Куманово превезувал 10 деца повеќе од дозволениот број.

Дополнително, над возилото бил извршен вонреден технички преглед, при што стручни лица утврдиле неисправност на уредите за сопирање, односно проблеми со силата на сопирање на работната и помошната сопирачка.

— реклама —

Против правниот субјект, одговорното лице во правното лице и возачот се преземени соодветни мерки и тие ќе се соочат со законски предвидените санкции. Возилото е исклучено од сообраќај до отстранување на утврдените недостатоци.

Од полицијата апелираат до сите учесници во сообраќајот да ги почитуваат сообраќајните правила и прописи, со цел да се придонесе за поголема безбедност на патиштата.