Додека Агенцијата за храна и ветеринарство (АХВ) издаде забрана за употреба на водата за пиење од гостиварскиот водовод поради основано сомнение дека е загадена и небезбедна, директорката на ЈП „Водовод“ – Гостивар, Артана Асани, тврди дека водоснабдителниот систем не е причина за зголемениот број заболени граѓани.
Како што пренесува ТВ „Телма“, Асани ги отфрла сомнежите дека водата е извор на епидемијата што деновиве го зафати Гостивар.
„Меѓу заболените има и лица кои пиеле само флаширана вода“, изјавила директорката, додавајќи дека според неа, можно е повеќе од 1.200 заболени граѓани да се затруле од храна или поради високите летни температури.
Нејзината изјава предизвика бројни реакции на социјалните мрежи. Една граѓанка јавно праша: „Може да се напие директорката за да потврди?“
Сепак, ставот на директорката се разликува од информациите што ги објавија Агенцијата за храна и ветеринарство и Министерството за внатрешни работи.
АХВ соопшти дека по известување од Основното јавно обвинителство во Гостивар, поплаки од граѓани и пријава од МВР, бил спроведен вонреден инспекциски надзор на пречистителната станица за вода во Вруток.
При контролата, како што наведуваат од Агенцијата, било утврдено дека во главниот цевковод на водоснабдителниот систем, без одобрение, била поставена пумпа која директно вбризгувала вода од реката Вардар во системот за водоснабдување.
Од Институтот за јавно здравје биле земени мостри од водата за лабораториско испитување, а до добивањето на резултатите АХВ издаде привремена забрана за користење на водата за пиење.
Во меѓувреме, од СВР Тетово информираа дека по насока на јавен обвинител постапувале поради сомневање за загадување на водата со која се снабдува Гостивар.
Според МВР, постојат основи на сомнение дека ЈП „Водовод“, во соработка со Општина Гостивар, поставило три пумпи во корито на истечни отпадни води, преку кои директно се вбризгувала вода во главниот цевковод со цел да се зголеми притисокот во мрежата поради недостиг од вода за пиење.
„Оваа активност најверојатно била преземена со цел да се зголеми притисокот во мрежата поради недостиг на питка вода, со што директно се загрозува здравјето на граѓаните на Гостивар. Се преземаат мерки за целосно расчистување на случајот, поради сомнение за сторено кривично дело „загадување на вода за пиење“ од член 219 од Кривичниот законик“, соопшти МВР.
Истрагата за случајот е во тек, а конечните причини за масовното труење ќе бидат познати по добивањето на резултатите од лабораториските анализи и по завршувањето на истражната постапка.
