Адвокатот Еленко Миланов, бранител на обвинетиот Миле Јанакиески во случајот „ТНТ“ смета дека Апелација треба да ја преиначи пресудата на Кривичен суд и да констатира апсолутна застареност на предметот за уривање на објектот „Космос“. На јавната седница, ова го побараа адвокатите, но и обвинителот од Вишото јавно обвинителство. Застарувањето го донесе измените на Кривичниот законик.
„Врз основа на решението за исправка на првостепената пресуда, побаравме јавна седница. Апелација мораше да закаже јавна седница и е одржана. Побаравме на седницата, согласно измените на Кривичниот законик, судот да утврди апсолутна застареност на кривичното гонење за сите обвинети. Истото го побара и застапникот на обвиението во неговото произнесување, кога се повика судот по службена должност да го примени поблагиот закон и да донесе одбивателна пресуда“, кажа Миланов.
За вчерашните јавни обвинувања од семејството Цановски, кои го градат „Космос“, Миланов смета дека е обид за притисок врз судиите.
„Ако таа фирма поседува факултет, на кој има Правен факултет, а на ниту еден од наводите немаше професор од тој факултет, од кривично-правната одбласт, сметам дека е доволно јасно дека немаше апсолутно ништо што е согласно законот, во она што тие го истакнаа. Се обидоа да направат невидена пресија.. И повторно она што се констатира постојано, бизнис елити или политичари се обидоа да вршат притисок врз судството“, додаде Миланов.
