„Кошта ја потврди вистината, уставните измени се единствениот услов за ЕУ“, вели Филипче

Претседателот на СДСМ, Венко Филипче, на денешната прес-конференција, оцени дека посетата на претседателот на Европскиот совет, Антонио Кошта, потврдила дека уставните измени се единствениот услов за продолжување на евроинтегративниот процес на Македонија.

На прес-конференција, Филипче изјави дека пораките испратени од Кошта биле јасни и недвосмислени и дека не постојат дополнителни гаранции или нови услови надвор од веќе познатата обврска за внесување на малцинствата во Уставот.

— реклама —

Според него, ветувањата на Владата за подобрување на преговарачката рамка, дополнителни гаранции или уставни измени со одложено дејство не се оствариле и претставувале погрешни очекувања пласирани во јавноста.

— реклама —

Филипче ја обвини власта дека преку, како што рече, пропаганда и лажен патриотизам го блокира европскиот пат на државата. Тој смета дека спротивставувањето на уставните измени нема врска со заштита на националниот идентитет, туку со избегнување на реформите и европските механизми за контрола и владеење на правото.

Лидерот на СДСМ повтори дека неговата партија поддржува внесување на малцинствата во Уставот со цел да продолжи процесот на пристапување кон Европската Унија. Според него, тоа ќе овозможи отворање на европските фондови, нови инвестиции и подобрување на животниот стандард на граѓаните.

— реклама —

Тој потсети дека СДСМ претходно предложила политичките партии заеднички да усвојат резолуција за националните црвени линии во преговарачкиот процес, како и можност граѓаните да се изјаснат на референдум за европската иднина на државата.

— реклама —

Филипче оцени дека Македонија се наоѓа пред историска можност која не смее да биде пропуштена и предупреди дека евентуалното одложување на евроинтеграциите може да ја остави земјата надвор од Европската Унија уште многу години.

Тој ја повика Владата да распише референдум и да им овозможи на граѓаните директно да се изјаснат за насоката во која треба да се движи државата, нагласувајќи дека местото на Македонија е во Европската Унија.