Крај на уплатниците ПП 30 и ПП 50: Нови обрасци, 19-знаковни сметки и шифри – еве што се менува во банкарскиот платен промет

Македонскиот платен промет поминува низ значајни промени со воведувањето на меѓународниот стандард ISO 20022, со кој досегашните уплатници ПП 30 и ПП 50 се заменуваат со нови обрасци. Промените се однесуваат на начинот на пополнување и обработка на платните налози, а не на парите или на постојните банкарски сметки на граѓаните и компаниите.

Една од главните новини е задолжителното користење на IBAN-форматот за денарските сметки. Досегашната 15-цифрена трансакциска сметка добива меѓународен формат со префикс MK07, со што вкупно содржи 19 знаци. Самата сметка останува непроменета, но се додаваат ознака за државата и две контролни цифри, кои помагаат да се откријат грешки при внесувањето и да се спречи погрешно насочување на средствата.

— реклама —

Се менуваат и шифрите за видот на плаќањето. Досегашните трицифрени ознаки, како 100 за набавки, 200 за услуги и 310 за плата, се заменуваат со четиризнаковни меѓународни кодови.

Така, за исплата на плата се користи SALA, за комунални сметки за струја, вода и интернет – UTIL, за даноци и административни такси – TAXS, за стоки – GDDS, за услуги – SCVE, за закупнини – RENT, а за осигурување – INSU.

— реклама —

Граѓаните што користат мобилно и електронско банкарство нема да мора да ги паметат новите кратенки. Банките ги вградуваат во своите апликации преку менија во кои намената на плаќањето е објаснета со зборови.

— реклама —

Зачуваните сметки на примачите во банкарските апликации се приспособени на новиот IBAN-формат. Сепак, кај дел од претходно креираните налози за редовни плаќања може да биде потребна дополнителна измена. Доколку старата шифра нема соодветна замена во новиот систем, корисникот ќе треба при следното плаќање да избере нова ознака и повторно да го зачува налогот.

Дополнително се стандардизираат полињата за повикување на број и модел на плаќање, со цел да се намалат грешките при внесување податоци од фактури на јавни претпријатија и телекомуникациски оператори.

— реклама —

Промени има и за граѓаните кои ги вршат уплатите на шалтер во банка или пошта. Старите обрасци се заменуваат со нови:

КТД (Кредитен трансфер во денари) – го заменува ПП 30 и се користи за плаќања меѓу граѓани и компании.
КТБ (Кредитен трансфер за буџетски корисници) – го заменува ПП 50 и е наменет за даноци, казни и такси кон државата.
ВГ (Внесување готовина) – доаѓа на местото на ПП 10.
ПГ (Повлекување готовина) – го заменува ПП 40.
ЗКТ (Збирен кредитен трансфер) – го заменува ПП 53 и се користи за групни исплати, како исплата на плати.

Воведувањето на новиот систем претставува и подготовка на македонскиот банкарски сектор за приклучување кон Единствената област за плаќања во евра (SEPA). Целта е да се овозможат побрзи, поедноставни и поевтини прекугранични плаќања со европските земји.