Хрватскиот производител на слатки Краш соопшти дека во 2025 година забележал пад на профитабилноста од околу 20 проценти, главно поради рекордно високите цени на какаото на светските берзи.
Според финансискиот извештај, нето добивката на групацијата изнесувала 6,5 милиони евра, што е намалување за 1,7 милиони евра во однос на претходната година, додека добивката пред камати, даноци и амортизација (EBITDA) паднала за 19 проценти на 15,8 милиони евра.
Иако вкупните приходи пораснале за 3,4 проценти и достигнале 193,9 милиони евра, растот на трошоците бил побрз, што резултирало со намалени маржи. Компанијата наведува дека цената на какаото на светските пазари во одредени периоди достигнувала и над 12.000 долари по тон, што значително го оптоварило производството.
Управата на Краш одлучила да не ги зголемува продажните цени, што дополнително влијаело врз намалувањето на профитот, а добивката е задржана во компанијата без исплата на дивиденда, со цел зачувување на финансиската стабилност.
И покрај падот на количинската продажба од 2,7 проценти, приходите пораснале благодарение на засилени продажни и маркетинг активности, особено во втората половина од годината.
Раст е забележан и на домашниот и на странските пазари, а компанијата во 2025 година значително ги зголемила инвестициите во модернизација на производството во Загреб и Осиек.
