Рускиот министер за надворешни работи Сергеј Лавров изјави дека исходот од војната во Украина ќе биде одлучен на бојното поле, а не преку преговори, пренесуваат светските медиуми.
Лавров остро го критикуваше отвореното писмо што украинскиот претседател Володимир Зеленски неодамна му го упати на рускиот претседател Владимир Путин, оценувајќи дека таквиот потег не е во духот на дипломатската комуникација.
Според него, фактот што писмото било јавно објавено и дистрибуирано низ светот покажува дека Киев нема вистински интерес за преговори.
Рускиот министер повтори дека, според ставот на Кремљ, клучно значење за развојот на конфликтот немаат дипломатските разговори, туку случувањата на фронтот.
Минатата недела Зеленски предложи директна средба со Путин, но рускиот претседател ја одби иницијативата, наведувајќи дека не гледа причина за таква средба.
Во меѓувреме, лидерите на Франција, Германија и Обединетото Кралство ја поддржаа иницијативата на украинскиот претседател и повикаа на прекин на огнот и преговори за постигнување траен мир.
Од Кремљ ја отфрлија оваа европска иницијатива, обвинувајќи ги западните држави дека зборуваат за мир, а истовремено продолжуваат со воената поддршка за Украина.
Лавров упати критики и кон САД, оценувајќи дека Вашингтон не покажува доволен интерес за обновување на претходните договори и дипломатски механизми за решавање на кризата. Според него, позициите на западните партнери дополнително ги усложнуваат напорите за постигнување политичко решение на конфликтот.
