Москва сè уште нема одлучено дали рускиот претседател Владимир Путин ќе отпатува во Мајами на самитот на Г20 што ќе се одржи во декември, објави „Интерфакс“, повикувајќи се на портпаролот на Кремљ, Дмитриј Песков.
„Сè уште не знаеме дали ќе одиме во Мајами“, изјави Песков.
Претходно денеска, советникот на Кремљ за надворешна политика, Јуриј Ушаков, изјави дека во Москва воопшто не се разговарало за можноста Путин да учествува на самитот.
Информациите за можно учество на рускиот претседател се појавија уште во април, откако американскиот претседател Доналд Трамп изјави дека би било корисно Путин да присуствува на собирот.
Песков ја коментираше и изјавата на украинскиот претседател Володимир Зеленски дека би отпатувал во Мајами доколку таму биде и Путин и дека би побарал средба со рускиот претседател.
Портпаролот на Кремљ го повтори ставот на Москва дека, доколку Зеленски сака средба со Путин, треба да дојде во Москва.
