Крилото на СДСМ кое бара оставка од Филипче повика на обединување на опозицијата по изборите во Србија

Организаторите на „Разговори за иднината во 12:05“, иницијатива на крилото во СДСМ кое бара оставка од партискиот лидер Венко Филипче, порачаа дека политичките промени во Србија и Унгарија покажуваат дека граѓаните се уморни од традиционалните политички партии, долгогодишните функционери и, како што наведуваат, корупциските профитери. Во соопштението објавено по изборите во Србија и Бугарија, тие повикаа на вистинско обединување на прогресивната опозиција, поголемо вклучување на младите во политиката и реформи на изборниот систем во Македонија.

„Добивме уште еден пример по Унгарија дека граѓаните се уморни од традиционалните политички опции, долгогодишните професионални политичари и корупциски профитери. Затоа се приклонуваат кон автентични политички коалиции на прогресивната демократска јавност“, наведуваат организаторите.

Тие им честитаа на граѓаните на Србија за високата излезност, а на студентската листа за изборната победа, оценувајќи дека истрајноста и непосредната комуникација со граѓаните можат да донесат политички промени. Истовремено, изразија надеж за брзо нормализирање на состојбите во Србија по речиси две години протести и политички тензии.

— реклама —

Во делот посветен на Бугарија, организаторите побараа од претседателката Илијана Јотова да иницира постапка за брза екстрадиција на Ива Михаилова во Македонија. Тие ја обвинија Јотова дека случајот го искористила во својата изборна кампања и оценија дека треба да преземе чекори за намалување на тензиите меѓу двете држави.

„Очекуваме, откако го злоупотреби бегството на Ива Михаилова во својата кампања, претседателката Илијана Јотова да покаже политичка мудрост и во пресрет на вториот круг да иницира постапка за нејзина брза екстрадиција во Македонија и соочување со правдата“, се наведува во соопштението.

— реклама —

Според организаторите, Јотова има морална одговорност да придонесе за подобрување на билатералните односи, имајќи предвид дека била потпретседателка на Румен Радев во периодот на потпишувањето на Договорот за добрососедство.

Тие предупредуваат дека евентуалното продолжување на радикалната реторика во бугарската претседателска кампања може да го зголеми притисокот во Македонија за преиспитување на Договорот.

Во соопштението се нагласува дека стремежот кон полноправно членство во Европската Унија не треба да подразбира безусловно прифаќање национални отстапки за кои нема широка поддршка. Организаторите оценуваат дека недоволно решителните реакции на политичките провокации од Софија ги продлабочуваат внатрешните поделби во Македонија и го отежнуваат постигнувањето консензус за неопходните реформи.

— реклама —

Во однос на домашните политички состојби, тие бараат исполнување на предизборното ветување за воведување една изборна единица со отворени листи, нагласувајќи дека реформата треба да се спроведе пред следните парламентарни избори.

Посебен акцент ставаат и на студентите и младите, за кои сметаат дека имаат капацитет да бидат значаен фактор во идните политички промени, без разлика на нивната етничка или верска припадност.

„Во Македонија студентите и генерално младите, без разлика на нивната етничка и верска припадност и колку во моментот се потценети од традиционалните партии, поседуваат интегритет и капацитет да бидат значаен фактор во политичките промени“, порачуваат организаторите.

Во завршниот дел од соопштението, тие упатуваат порака за пошироко политичко обединување, оценувајќи дека без заедничко дејствување на прогресивните опозициски сили тешко може да дојде до промена на власта.

„Уште еднаш се потврди дека без вистинско обединување на целокупната опозициска прогресивна демократска јавност е речиси невозможно да се победат десничарските популистички власти на Балканот“, наведуваат организаторите на „Разговори за иднината во 12:05“.