Кривичниот суд реагира на вчерашната изјава на републичкиот јавен обвинител, Љубомир Јовески, кој коментирајќи ја пресудата за предметот „Тревник“ во која ослободени од вина беа новинарот Драган Павловиќ Латас и неговите браќа. Јовески на вчерашната пресс конференција рече дека на такви судии не им е местото во правосудството.
Еве што му одговорија од Кривичен на Јовески:
-Во однос на вчерашната изјава на Јавниот обвинител на РСМ, Кривичниот суд – Скопје укажува на обвинителството наместо редовно и неосновано да го напаѓа судот и судиите после секоја судска одлука од која не се задоволни, да си погледне во сопствениот „двор“.
Судот и судиите работат согласно Законските одредби, го почитуваат начелото на еднаквост на оружјата, Уставно загарантираните права и слободи и одлучуваат врз основа на доказите и аргументите, а не врз основа на лични желби на странките во постапката, а секоја првостепена одлука на Кривичниот суд се преиспитува од повисоките судски инстанци, по изјавена жалба од незадоволната страна.
Како суд бараме во иднина обвинителството да се однесува со повеќе почит кон судиите и судиската функција, нивните коментари и изјави да се во рамки единствено на нивните надлежности, а не на паушални обвинувања“, соопштија од Основен кривичен суд – Скопје.