Во Манастирот Рајчица, посветен на светиот великомаченик Георгиј Победоносец, викендов со свечени богослужби ќе биде одбележан големиот христијански празник Воздвижение на Чесниот и Животворен Крст Господов – Крстовден.
Од манастирот информираат дека празнувањето ќе започне во сабота, 26 септември, во 18 часот, со свечена празнична вечерна богослужба, на која молитвено ќе претстои старецот на Обителта, Неговото Преосвештенство Епископот Антаниски г. Партениј.
На крајот од вечерната богослужба, проследен со стиховите од празничниот тропар, ќе биде изнесен крстот во кој има честичка од Чесното Дрво, по што повторно ќе биде внесен во олтарот.
Централното одбележување продолжува во недела, 27 септември. Утрената богослужба ќе започне во 7:30 часот, а на нејзиниот крај од олтарот ќе биде изнесен сребрениот филигрански крст, во кој се поставува крстот со честичка од Чесниот и Животворен Крст. Во текот на годината тој се чува во големиот кивот на Бигорскиот манастир.
По чинот на Воздвижението на Крстот, верниците ќе имаат можност да се поклонат пред Чесното Дрво.
Во 9 часот ќе започне Светата архиерејска Златоустова литургија, со која ќе чиноначалствува Епископот Антаниски г. Партениј.
Од Манастирот Рајчица ги повикуваат верниците заеднички да го одбележат празникот и да учествуваат во богослужбите посветени на Воздвижението на Чесниот Крст.
