(Видео) Крвав напад во Турција: Осум лица убиени, полицијата трага по напаѓачот

Осум лица загинале, а уште едно е тешко повредено во вооружен напад во три села во западниот дел на централна Турција. Осомничениот сè уште не е пронајден, а полицијата трага по возач на црвен автомобил, за кој сведоци тврдат дека побегнал од местото на настанот.

Од канцеларијата на гувернерот на областа Афјонкарахисар соопштиле дека нападот се случил во раните вечерни часови во рурално подрачје во близина на истоимениот град, кој се наоѓа меѓу Анкара и Измир.

— реклама —

Според државната новинска агенција „Анадолу“, две жени со прострелни рани биле пронајдени на пат во селото Јукаритандир. И покрај итното пренесување во болница, тие им подлегнале на повредите.

— реклама —

Уште три тела биле пронајдени во селото Кијир, на околу половина час возење североисточно од првото место, а дополнителни три жртви биле откриени во селото Ајазини, уште половина час возење кон исток.

— реклама —

Според телевизијата НТВ, полицијата продолжува да трага по осомничениот.

— реклама —

Во нападот има и уште едно тешко повредено лице, кое било пронајдено во критична состојба и се бори за живот во болница, пренесува агенцијата „Анадолу“. Не е наведено во кое место било повредено лицето.