Болниците и натаму чекаат на министерството за здравство за да почне гасификацијата на објектите и да се намали загадувањето. Кумановската болница која деновиве беше посочена како загадувач на градот и натаму се грее на мазут. Раководството тврди дека тие навреме доставиле барање до здравствените власти за промена на начинот на греење, но одговор не добиле, објави 24.мк.
„Треба сите да си понесеме одговорност. Јас како раководно лице можам да кажам дека навремено сум ги преземала оние мерки кои се во моја надлежност. Моја работа беше да направам проект за гасификација на болницата и во 2017-та година завршена е реализацијата и во електронска форма е доставен до Министерството за здравство. Имаме упатено писмо и до Владата во кое бараме пари за гасификација, од таму не упатија до МЗ.“ - вели д-р Снежана – директорка на Општа Болница Куманово.
И градоначалникот на Куманово бара министерството за здравство да и даде пари на болницата за да инсталира нов систем на греење и да се приклучи на гасоводната мрежа.
