Извештајот на Институтот за јавно здравје (ИЈЗ) за анализите на водата во Гостивар, според неофицијални информации што ги објави порталот „Курир“, покажува дека во два од четирите испитани примероци е утврдено присуство на фекални колиформни бактерии, додека во еден примерок било регистрирано и зголемено ниво на хлор.
Станува збор за неофицијални информации кои засега не се потврдени од Институтот за јавно здравје, Министерството за здравство или од Основното јавно обвинителство, кое води предистражна постапка за случајот.
Доколку ваквите лабораториски наоди бидат официјално потврдени, тие би можеле да укажуваат дека дел од водоводната мрежа била контаминирана со фекално загадување, што би било една од можните причини за масовното појавување на гастроентеритис кај жителите на Гостивар. Во изминатите денови повеќе од 1.600 граѓани побараа лекарска помош, а во општината беше прогласена епидемија.
Според информациите на „Курир“, една од насоките во кои се движи истрагата е можноста во водоводниот систем да дошло до навлегување на фекално загадување, по што било извршено дополнително хлорирање на водата како мерка за дезинфекција. Токму поради тоа, во еден од анализираните примероци било констатирано и повисоко количество на хлор.
Порталот наведува и дека извештајот на Институтот за јавно здравје веќе бил доставен до Основното јавно обвинителство, кое треба да утврди дали постојат елементи за кривична одговорност и дали ќе бидат преземени понатамошни процесни дејствија.
Во меѓувреме, Јавното обвинителство соопшти дека предметот сè уште е во фаза на предистрага и дека сите прибрани докази се анализираат со цел да се утврди дали е сторено кривично дело, како и евентуалните сторители. Од ОЈО нагласуваат дека поради тајноста на постапката засега не можат да соопштат повеќе детали.
Ниту Институтот за јавно здравје, ниту другите надлежни институции досега не ја потврдија официјално содржината на лабораторискиот извештај.
