Иако бројот на купопродажни договори е намален, пазарот на недвижности во Србија во вториот квартал од 2026 година забележал раст на вкупната вредност. Најскапите трансакции повторно се реализирани во Белград, каде што квадратен метар стан достигнал цена од околу 9.300 евра.
Според податоците на Републичкиот геодетски завод, од април до јуни во Србија биле прометувани недвижности во вкупна вредност од 2,2 милијарди евра. Во однос на истиот период минатата година, тоа е зголемување од 8,1 отсто.
Во истиот период биле склучени 30.495 купопродажни договори, што претставува пад од 5,4 отсто на годишно ниво.
Рекордите и овојпат ги држи главниот град. Најскапиот стан бил продаден во Савски Венац за 1,6 милиони евра, а токму таму е забележана и највисоката цена по квадрат – околу 9.300 евра. Во Вождовац, пак, била продадена најскапата куќа, за 1,4 милиони евра.
Висока цена достигнало и гаражното место во општина Стари Град, за кое купувачот издвоил 54.000 евра.
Становите и натаму се најзастапени во вредноста на вкупниот промет. Во вториот квартал за нив биле издвоени 1,3 милијарди евра. По нив следуваат куќите со 175 милиони евра, градежното земјиште со 156 милиони, деловните простории со 119 милиони и земјоделското земјиште со 77 милиони евра.
Од вкупната вредност на пазарот, 369,7 милиони евра отпаѓаат на делумно регулираниот пазар.
Кредитите учествувале во финансирањето на 15 отсто од сите купопродажби, што е ист процент како и во вториот квартал од 2025 година. Најчесто биле користени за купување станови, при што 34 отсто од договорите за продажба на станови биле реализирани со кредитно финансирање.
Во меѓувреме, сите поголеми градови бележат пад на бројот на купопродажни договори. Во Нови Сад намалувањето е еден отсто, во Белград 1,7 отсто, во Ниш 4,3 отсто, а најголем пад е регистриран во Крагуевац – седум отсто.
Само во Белград, за станови во вториот квартал биле издвоени 742 милиони евра.
