„Лагите на СДС се на нивна штета и нема да ја сокријат одговорноста на кадрите на СДС, ДУИ и Таравари во Гостивар“, вели ВМРО-ДПМНЕ

ВМРО-ДПМНЕ преку соопштение реагира на обвинувањата од СДС за состојбата со водоснабдувањето во Гостивар, оценувајќи дека опозициската партија со, како што наведуваат, лаги и манипулации се обидува да ја прикрие одговорноста на сопствените кадри.

— реклама —

Од владејачката партија тврдат дека СДС и нејзиниот претседател Венко Филипче ја насочуваат јавноста кон, како што велат, погрешна адреса и покажуваат непознавање на институционалните надлежности.

— реклама —

Според ВМРО-ДПМНЕ, контролата на квалитетот на водата е во надлежност на локалните институции, а во Гостивар локалната власт ја предводат кадри поддржани од СДС, ДУИ и Арбен Таравари. Оттаму посочуваат дека градоначалникот Валбон Лимани е нивен политички избор и дека токму таму треба да се бара одговорност.

„Наместо да одговорат кој потфрлил таму каде што тие ја имаат локалната власт, СДС секојдневно пласира невистини и ја насочува јавноста кон погрешна адреса“, наведуваат од партијата.

— реклама —

Во соопштението се додава дека надлежните институции и служби работат на надминување на состојбата со водоснабдувањето во Гостивар, додека, според ВМРО-ДПМНЕ, СДС продолжува со политички обвинувања.

— реклама —

Од партијата наведуваат дека веќе е обезбедена технички исправна вода за лична и домашна хигиена, а во најкус можен рок, согласно проценките на надлежните служби, се очекува да биде обезбедена и безбедна вода за пиење за жителите на Гостивар.