Легендарниот пејач Лајонел Ричи беше принуден да откаже два концерта откако му се слоши за време на првиот настап од неговата нова турнеја.
Компанијата „Лајв Нејшн Чикаго“ во четвртокот соопшти дека концертите во Чикаго и Колумбус, закажани за 26 и 27 јуни, се одложени.
Според соопштението, лекарите му препорачале на 77-годишниот музичар да одмори и целосно да закрепне пред повторно да се врати на сцената заедно со групата „Ерт, Винд енд Фајр“.
„Лајонел и „Ерт, Винд енд Фајр“ ќе ја продолжат турнејата во вторник, на 30 јуни, со концерт во Питсбург“, се наведува во соопштението.
Се додава дека Ричи е многу разочаран поради одложувањето на настапите, но со нетрпение очекува повторно да се сретне со својата публика. Новите датуми за концертите ќе бидат објавени дополнително.
До здравствените проблеми дошло за време на концертот во арената „Гранд Казино“ во Сент Пол, Минесота, кога на Ричи му се слошило додека го изведувал својот хит „Dancing on the Ceiling“.
Откако седнал на платформата на сцената, четирикратниот добитник на наградата Греми ѝ рекол на публиката дека му се врти и низ шега изјавил:
„Кога ви се врти, седнете.“
Потоа седнал зад клавирот и продолжил да ја изведува песната „Three Times a Lady“, по што следела непланирана пауза.
Околу 40 минути подоцна, саксофонистот Дино Солдо ја известил публиката дека Ричи не се чувствува добро и дека нема да може да го продолжи концертот.
Според тапанарот на „Ерт, Винд енд Фајр“, Џон Парис, пејачот пред настапот не покажувал никакви знаци на здравствени проблеми и најверојатно станувало збор за блага дехидратација.
Според „ТМЗ“, по инцидентот Ричи бил прегледан од медицински лица зад сцената, а потоа од претпазливост бил пренесен во болница.
Турнејата на Лајонел Ричи и „Ерт, Винд енд Фајр“ опфаќа вкупно 26 настапи низ Северна Америка, а по одложените концерти се очекува да продолжи со настапите во Торонто, Бостон, Њујорк, Филаделфија, Сан Франциско и Лос Анџелес.
