Рускиот министер за надворешни работи, Сергеј Лавров, побара дополнителни појаснувања во врска со улогата на САД во процесот за решавање на конфликтот во Украина, откако американскиот државен секретар Марко Рубио изјави дека на самитот меѓу САД и Русија во Енкориџ, Алјаска, во август 2025 година не бил постигнат никаков договор.
Лавров нагласи дека за време на средбата на Алјаска, рускиот претседател Владимир Путин и американскиот претседател Доналд Трамп разговарале за предлозите на Вашингтон поврзани со Украина, кои, според него, биле прифатени од руската страна.
„Секако, целата оваа ситуација треба да се разјасни. Но, останува фактот дека американските предлози беа разгледани на Алјаска, а руската страна ги прифати“, изјави Лавров, пренесуваат руските медиуми.
Тој оцени дека не е соодветно Рубио да тврди дека на средбата немало договор.
„Кога мојот колега Марко Рубио вели дека на Алјаска имало само предлози, но не и договор, тогаш се поставува прашањето што всушност подразбираме под договор. Ако една страна ги изложи своите предлози, а другата изрази согласност со нив, тогаш да се каже дека немало договор изгледа прилично нељубезно“, рече Лавров.
Рускиот министер потсети дека неколку дена пред самитот во Енкориџ, специјалниот пратеник на американскиот претседател, Стив Виткоф, ја посетил Москва и ги пренел истите предлози на Доналд Трамп.
Според Лавров, за време на средбата на Алјаска, Путин детално ги повторил американските предлози, а Виткоф потврдил дека тие биле точно пренесени.
Изјавата на Лавров следува откако Рубио во четвртокот изјави дека на самитот на Алјаска „немало договор, туку само предлог“.
