Рускиот министер за надворешни работи Сергеј Лавров на средбата со американскиот државен секретар Марко Рубио во Манила порача дека за Москва е неприфатливо САД да продолжат со испораките на оружје за Украина, соопшти руското Министерство за надворешни работи.
Средбата, која траела повеќе од половина час, се одржала на маргините на состанокот на Асоцијацијата на државите од Југоисточна Азија (АСЕАН) на Филипините и претставува прва средба на двајцата дипломати од септември 2025 година.
Според руското Министерство за надворешни работи, Лавров во разговорот истакнал дека е „неприфатливо да продолжи испраќањето оружје до режимот во Киев“. Тој, исто така, ја критикувал, како што наведе Москва, „дестабилизирачката политика на европските земји“, обвинувајќи ги дека се обидуваат да ѝ нанесат „стратешки пораз“ на Русија.
Лавров повторил дека руската страна останува подготвена за политичко и дипломатско решение на конфликтот.
За време на разговорите било договорено да продолжат контактите меѓу министерствата за надворешни работи на двете земји, вклучително и соработка во рамките на меѓународните организации.
Според дипломатски извор, на кој се повикуваат руските медиуми, иницијативата за одржување на средбата дошла од американска страна.
