Лавров: САД се откажуваат од улогата на непристрасен посредник во Украина

Рускиот министер за надворешни работи, Сергеј Лавров, денеска изјави дека Москва смета оти САД постепено се откажуваат од улогата на непристрасен посредник во преговорите за завршување на војната во Украина и наместо тоа го засилуваат притисокот врз Русија.

— реклама —

Говорејќи пред странски дипломати во Москва, Лавров оцени дека постапките на Вашингтон укажуваат на промена во американскиот пристап кон конфликтот.

„Што се однесува до Соединетите Американски Држави, судејќи според нивните постапки, се чини дека тие се откажуваат од стремежот кон улогата на непристрасен посредник и наместо тоа го следат патот на зголемување на притисокот врз Русија преку санкции“, изјави Лавров.

— реклама —

По враќањето на Доналд Трамп во Белата куќа во 2025 година, САД се позиционираа како посредник во разговорите меѓу Киев и Москва. Сепак, преговорите досега не донесоа конкретен напредок, а дополнително се усложнија по избувнувањето на конфликтот на Блискиот Исток.

— реклама —

Минатата недела, на самитот на Г7 во Франција, американскиот претседател Доналд Трамп изјави дека Русија треба да постигне договор и не ја исклучи можноста за повторно воведување санкции кон Москва. За време на самитот, Трамп оствари и средба со украинскиот претседател Володимир Зеленски, по што беше потпишан документ со кој се најавува цврст пристап кон Русија.

Лавров во своето обраќање упати критики и кон Европа, оценувајќи дека со обезбедувањето воена поддршка за Киев, европските земји стануваат „главна закана за глобалниот мир и безбедност“.

— реклама —

Американскиот државен секретар Марко Рубио, пак, кон крајот на мај порача дека САД и натаму се подготвени да посредуваат во конфликтот, кој се смета за најсмртоносен во Европа по Втората светска војна.