Лавров: Западот активно се подготвува за војна против Русија

Рускиот министер за надворешни работи Сергеј Лавров тврди дека политичките кругови во повеќето западни земји активно се подготвуваат за можен конфликт со Русија и дека притоа ја шират тезата за наводна руска закана.

— реклама —

„Денес владејачките кругови и елитите на повеќето западни земји шират мит за закана која наводно доаѓа од Русија, активно се подготвуваат за војна против нашата земја и, меѓу другото, нè обвинуваат дека наводно ги поткопуваме европските вредности“, рекол Лавров на отворањето на Четвртиот конгрес на Меѓународното движење на русофилите.

— реклама —

Неговата изјава уследила еден ден откако тој изразил надеж дека европските земји го слушнале неговото предупредување дека евентуален напад врз Русија би довел до „многу кратка војна“.

Лавров рекол дека доколку Европа, која според него секојдневно зборува за подготовки за војна со Русија, ја нападне Руската Федерација, конфликтот би бил „целосно поинаков“ и би траел многу кратко. Тој додал дека се надева оти ова предупредување било слушнато во европските престолнини и во структурите кои, како што рекол, се обидуваат да се претстават како обединета Европа.

— реклама —

Говорејќи за Европа, рускиот министер ја обвинил и за историски страдања и разорувања што, според него, му ги нанела на светот, поради што, како што навел, многумина ја гледаат како „извор на злото“.

Лавров повторно ја истакнал и тезата дека идејата за нанесување „стратешки пораз на Русија“ и понатаму се наоѓа во центарот на, како што ги опишал, западните намери кон Руската Федерација.