Две кривични дела „измама“, извршени во Охрид и Струга, се расчистени, а полицијата ги утврдила осомничените сторители кои, според МВР, се стекнале со противправна имотна корист од 5.500 евра.
Станува збор за А.С. и Д.С., двајцата од Велес. По преземените мерки и активности, денеска полициски службеници од криминалистичката полиција при СВР Велес, со судска наредба, извршиле претрес во нивниот дом.
При претресот биле пронајдени и одземени повеќе лажни банкноти во евра во различни апоени, српски динари, како и повеќе предмети што наликувале на злато и накит. Пронајдени биле и циркони, алки, синџири, предмети налик на кристали, повеќе кутии за накит и мобилни телефони за кои постојат сомневања дека биле користени при извршувањето на кривичните дела.
Во расчистувањето на случаите учествувале Одделот за криминалистичка полиција – Сектор за општ и насилен криминал, во координација со СВР Охрид и СВР Велес.
По целосното документирање на случајот и во координација со јавен обвинител, против А.С. и Д.С. ќе биде поднесена соодветна кривична пријава.
