Воздушниот сообраќај на аеродромот во Минхен повторно се одвива според редовниот распоред, откако претходно беше привремено прекинат поради мирис на чад во контролната кула.
Портпаролот на аеродромската управа, Роберт Вилхелм, изјави за германскиот весник „Билд“ дека летовите повторно се реализираат целосно нормално.
До привремената обустава на воздушниот сообраќај дошло откако во контролната кула бил почувствуван мирис на горење. Според првичните информации, причината бил оштетен ремен на вентилатор во вентилацискиот систем.
Германскиот магазин „Шпигел“ објави дека контролната кула била евакуирана во 20:33 часот по локално време поради мирисот на чад.
„Техничката компонента во вентилацискиот систем е заменета и сега сè функционира нормално“, изјави Вилхелм. Тој додаде дека контролорите на летање почувствувале мирис на горење, но не биле забележани ниту пламен ниту чад.
Сепак, согласно безбедносните протоколи, била повикана противпожарната служба за да ја утврди причината за инцидентот.
Вилхелм посочи дека засега нема прецизни информации за бројот на летови што биле погодени од привременото прекинување на сообраќајот.
Германските медиуми првично објавија дека избувнал пожар во контролната кула, но од аеродромот подоцна појаснија дека немало отворен пламен и дека станувало збор за технички дефект во вентилацискиот систем.
