Пратеникот и член на Извршниот комитет на ВМРО-ДПМНЕ, Миле Лефков, во гостување на телевизијата „Алфа“, се осврна на реформските закони што се носат во Собранието и на усогласувањето на македонското законодавство со законодавството на Европската Унија.
Лефков оцени дека усогласувањето на законодавството со европската регулатива е еден од важните сегменти на процесот на евроинтеграција, покрај дипломатскиот и политичкиот аспект.
„Можам да ве уверам и вас и македонската јавност дека парламентарниот состав, овој парламентарен состав, работи неуморно и тоа беше признаено од страна на Европската комисија, и во извештајот и во тоа што Македонија предничи во реформите коишто се однесуваат на усогласување со европската регулатива“, рече Лефков.
Тој посочи дека, според него, динамиката на донесување закони во актуелниот парламентарен состав е значително поголема во споредба со претходниот период.
„Ако ги погледнете извештаите, ќе видите еден четиригодишен мандат целосно потрошен на донесување на околу 430 законски решенија, сега во овој двојно пократок период донесени над 740 закони“, изјави Лефков.
Пратеникот се осврна и на начинот на користење на европското знаменце при носењето на законите. Според него, во претходниот период европското знаменце било користено и за измени и донесување закони за кои тој смета дека не биле поврзани со усогласување со европската регулатива.
„Нешто што во последниот мандат на Собранието нема повеќе како во времето на СДС и ДУИ, кога се носеа разноразни закони, како КЗ, законот за лекови и други разни закони, поврзани дали со марихуана или со други лукративни дејности коишто поминуваа со европско знаменце, и тоа повеќе го нема“, рече Лефков.
Тој зборуваше и за надзорната функција на Собранието и за разгледувањето на извештаите од Судскиот совет и Советот на јавни обвинители.
Лефков посочи дека по доаѓањето на власт, извештаите биле разгледувани во Собранието, при што, како што наведе, биле упатувани бројни забелешки и дел од нив не биле прифатени.
„Како резултат на таа надзорна функција на Собранието, се влезе и се донесоа нови закони, нов закон за Советот на јавни обвинители и беа спроведени со целосна јавна расправа“, кажа Лефков.
