Легализирал дивоградба и овозможил отуѓување државно земјиште, кривична пријава против поранешниот градоначалник на Струмица

СВР Струмица поднесе кривична пријава против поранешниот градоначалник на Струмица, поранешна раководителка во општинскиот Сектор за урбанизам и управител на правно лице од Битола, поради сомнение за злоупотреба на службената положба и овластување и фалсификување исправа.

Според Министерството за внатрешни работи, пријавени се К.К. (36) од Струмица, кој во времето на наводното дело бил градоначалник на општината, С.Р. (38), тогашна раководителка на Секторот за урбанизам, комунални работи и градежно земјиште, и Ј.П. (60) од Битола, кој бил управител на правно лице што во меѓувреме е ликвидирано.

— реклама —

Од МВР информираат дека во 2022 година, К.К. и С.Р. наводно ја злоупотребиле службената положба за да овозможат легализација на бесправно изграден објект на катастарска парцела во селото Куклиш. Според пријавата, С.Р. побарала од Ј.П. да изготви елаборат за бришење објекти од катастарската парцела, кој потоа бил искористен за бришење објекти во сопственост на Општина Струмица, со цел парцелата да добие чист имотен лист.

Ј.П. изготвил елаборат и технички извештај во кои, според МВР, невистинито било наведено дека на локацијата нема објекти. Овие документи биле употребени во постапката за бришење на објектите што биле во сопственост на општината, а се наоѓале на катастарска парцела во сопственост на државата.

— реклама —

Со ваквите дејствија, според полицијата, на Т.Ј. од Куклиш му била овозможена противправна имотна корист. Првопријавениот му издал решение за легализација на бесправно изградена зграда со намена стовариште, со внатрешна површина на деловниот простор од 161 квадратен метар.

— реклама —

Според пријавата, со легализацијата му била овозможена и постапка за откуп на земјиштето под објектот, како и отуѓување на 866,46 квадратни метри земјиште во државна сопственост и запишување на имотот на негово име.

МВР наведува и дека при постапката не биле земени предвид претходни судски одлуки поврзани со објектот. Во 2016 година, Вишиот управен суд го одбил барањето на Т.Ј. за легализација, со образложение дека објектот се наоѓа на парцела на која Општина Струмица има право на сопственост на објект. Во 2019 година била донесена и друга пресуда со која било потврдено дека објектот е изграден без соодветно одобрение за градење.

Врз основа на утврдената состојба, овластен градежен инспектор при Општина Струмица претходно му издал решение на Т.Ј. со кое му наложил да ја отстрани градбата.

Според МВР, со пријавените дејствија му била овозможена корист на Т.Ј., а била предизвикана штета на Општина Струмица и на државата. Кривичната пријава е поднесена до Основното јавно обвинителство Струмица.