Двајца странски државјани се лишени од слобода на Граничниот премин „Табановце“, откако преку системот „Безбеден град“ било утврдено дека на автопатот А1 возеле со повеќе од двојно поголема брзина од дозволената.
Првиот случај бил регистриран на 26 август во 22:15 часот, кога полицијата при контрола на излез од државата го проверила автомобилот „мерцедес-бенц“ со српски регистарски ознаки, управуван од 51-годишната И.М. од Србија.
Проверка преку системот „Безбеден град“ покажала дека таа на автопатот А1, на делницата Демир Капија–Гевгелија, возела со 168 километри на час, иако на местото максималната дозволена брзина е 80 километри на час.
И.М. била лишена од слобода, а против неа ќе биде поднесена соодветна кривична пријава за безобѕирно управување со моторно возило.
Вториот случај бил регистриран во раните утрински часови на 27 август. Во 05:00 часот на „Табановце“ полицајците извршиле контрола на автомобил „ауди“ со холандски регистарски ознаки, управуван од 32-годишниот А.А. од Холандија.
И во овој случај системот „Безбеден град“ утврдил дека возачот направил прекршување на автопатот А1, во близина на Демир Капија. Тој возел со 177 километри на час на делница каде што дозволената брзина е 80 километри на час.
А.А. бил лишен од слобода и против него ќе биде поднесена соодветна кривична пријава.
