Министерката за образование и наука Весна Јаневска ја отвори Летната школа на Заедничкиот истражувачки центар на Европската комисија (JRC), која до 18 септември се одржува на Универзитетот „Гоце Делчев“ во Штип.
Школата е посветена на теми поврзани со проценката на квалитетот на воздухот, почвата и водата, кои се значајни за спроведувањето на Европската зелена агенда. На неа учествуваат напредни студенти, докторанди и млади истражувачи од Македонија и земјите од Западен Балкан.
Јаневска истакна дека школата е можност за зајакнување на научните и истражувачките капацитети и потврда дека Македонија е подготвена активно да придонесува кон заедничките европски цели.
„За Македонија, како економија во процес на пристапување кон Европската Унија, оваа школа е можност за јакнење на капацитетите и јасна потврда дека сме подготвени да бидеме сериозен европски партнер што активно придонесува кон заедничките цели и ја гради својата иднина врз европските вредности“, рече Јаневска.
Учесниците од Македонија, Албанија, Босна и Херцеговина, Косово, Црна Гора и Србија ќе имаат можност директно да работат со научници од JRC и експерти, да ги запознаат истражувачките алатки за проценка на емисиите и влијанијата врз животната средина, како и современи методи за подобрување на квалитетот на водата и здравјето на почвата.
„Загадувањето на водата, почвата и воздухот се најголемите ризици за здравјето на сите нас во Европа. Сега, пред нас стои јасен ултиматум: или ќе делуваме решително, или сериозно ќе ја загрозиме иднината на нашите деца“, порача министерката.
Јаневска нагласи дека научниот пристап и одржливите решенија се во основата на промените, посочувајќи дека Министерството за образование и наука ја става науката и истражувањата во центарот на своите политики.
Таа информираше дека државните факултети, научните институти, МАНУ и јавните научни установи можат да конкурираат за државно финансирање на научно-истражувачки проекти. Во 2025/2026 година, по овој основ биле доделени 6 милиони евра буџетски средства.
Коорганизатор на Летната школа е Универзитетот „Гоце Делчев“ во Штип, кој е стратешки регионален и европски партнер на Заедничкиот истражувачки центар на Европската комисија.
